Veurbeeldteks

Ein veurbeeldteks in aaj sjpelling en vervolgens in sjpelling van op vandaag (synoptisch).
De teks is van róndj 1865.

Emile Seipgens, Nae-waor, Marie, nae-waor?

1.

Zèk, wèts-du ‘t nog - dae Zomerdaag -
Zèk, wèts doe ‘t nog, dae zomerdaag
‘Et is al mennig jaor gelejen
‘t is al mennig jaor geleje
Mer wie alt det ‘ch ouch waeren maag
mer wie ald det ‘ch ouch waere maag
Det bliift mich bi oet oos verlejen -
det blieft mich bie oet oos verleje.
De zon stong branjend in de locht
De zón sjtóng branjend in de lócht
En piilrecht baoven de aerd te glansen....
en pielrecht baove de aerd te glanse...
Gei winjdje goof ei bietje tocht,
Gei windje goof ei bietje tocht,
Me kos de hitst op ‘t veljd zeen dansen
me kós de hitst op ‘t veljd zeen danse,
Den hemel waas zoo blauw, zoo klaor....
d’n hemel waas zo blauw, zo klaor,
Naewaor, Marie, nae-waor?
naewaor. Marie, naewaor?

2.

Veer gingen lanzaam door de zanjd
Veer ginge lansaam door de zandj
‘t veljd in langs ‘et bleuijend kaoren;
‘t veljd in langs ‘t bleujend kaore.
Du streelsde ‘t mit de vlake hanjd
Doe sjtreelsde ‘t mit de vlake hanjd
En speelsde mit de hangende aoren...
en sjpeelsde mit de hangende aore...
Veer zongen neet, veer sproken neet,
Veer zónge neet, veer sjproke neet,
Veer zochten daotoe ouch gein raeijen,
veer zóchte daotoe ouch gein raeje.
Veer wollen niks mit ooze weet,
Veer wólle nieks mit oze weet,
Veer gingen mer get zamen traeijen
veer ginge mer get same traeje
Al waas de locht ouch drökkend zwaor
al waas de lócht ouch drökkend zjwaor,
Naewaor, Marie, naewaor!
naewaor, Marie, naewaor!

3.

De möggen dansden om os haer
De mögke dansden óm ós haer
De krekel had zich heis gezongen....
de krekel had zich heis gezónge...
Du zags: ‘t Weurdt morgen weer schoon waer-
Doe zags: ‘t Weurt morge weer sjoon waer,
En pluksde bloomen zoo ze stongen;
en plöksde blome zo ze sjtónge;
Ich plukde mit in diine schoot
ich plökde mit in diene sjoot
En al de bloomen die veer vonjen
en al de blome die veer vónje
Höbs-du doorein half blauw en rood
höbs doe doorein half blauw en rood
Tot eine bonjte krans gebonjen -
tót eine bónjte krans gebónje.
Dae zats-du op diin donkel haor.....
Dae zats doe op dien dónkel haor,
Nae-waor, Marie, nae-waor?
Naewaor, Marie, naewaor?

4.

De zon zonk neer mit volle glans
De zón zónk neer mit volle glans
Wie in ein zee van golje water;
wie in ein zee van golje water;
Ich zag: ‘Marie, gaef mich dae krans
ich zag: ‘Marie, gaef mich dae krans
Det ich hem dich bewaar tot later!
det ich hem dich bewaar tót later!
Nae! wonks du mit ne malsche lach
Nae! wónks doe mit ‘ne malse lach
En bleefs mich in miin ougen kiiken....
en bleefs mich in mien ouge kieke...
Ich wis neet meer waat ‘ch deei of zag...
Ich wis neet meer waat ‘ch deej of zag...
Ich veulde ‘t blood nao baoven wiiken....
Ich veulden ‘t blood nao baove wieke...
Diin oug waas ouch zoo deep... zoo klaor....
Dien oug waas ouch zo deep... zo klaor...
Nae waor, Marie, nae-waor?
Naewaor, Marie, naewaor?

5.

Marie wo is dae schoonen tiid,
Marie wo is dae sjonen tied,
Wo is dae bloomenkrans gebleeven?...
wo is dae blomekrans gebleve?
Och hoeveul zaken zin veer kwiit
Och hoeväöl zake zin veer kwiet
Die mit dae wonjerschoonen tiid
die mit dae wónjersjone tied
Veur eeuwig zin e-weg gedreven!...
veur eeuwig zin eweg gedreve!
Waal schiint de zon, mer zoo-ne glans
Waal sjient de zón, mer zone glans
Es toen, haet zi veur os verlaoren -
es toen, haet zie veur ós verlaore;
Waal bleuijen bloomen, in ‘et kaoren,
waal bleuje blomen in ‘t kaore,
Mer deenen os neet meer tot krans!..
mer denen ós neet meer tót krans!
En waas de krans allein nog mer verlaoren,
En waas de krans allein nog mer verlaore,
Mer wo is zelfs diin donkel haor,
mer wo is zelfs dien dónkel haor,
Nae-waor, Marie, nae-waor?
naewaor, Marie, naewaor?